Trump pritet të zhvillojë sot biseda me Putinin dhe Zelenskyn për luftën në Ukrainë

Trump pritet të zhvillojë sot biseda me Putinin dhe Zelenskyn për luftën në Ukrainë

Presidenti i Shteteve të Bashkuara, Donald Trump, pritet të zhvillojë gjatë ditës së sotme biseda telefonike me presidentin rus Vladimir Putin dhe presidentin ukrainas Volodymyr Zelensky, në kuadër të përpjekjeve për avancimin e negociatave të paqes.

Telefonatat pritet të zhvillohen pas takimeve që të dërguarit e Trumpit, Steve Witkoff dhe Jared Kushner, zhvilluan gjatë fundjavës me liderët e Rusisë dhe Ukrainës.

Sipas një zyrtari, Trump fillimisht do të konsultohet me Witkoff dhe Kushner, më pas pritet të kontaktojë Putinin dhe në fund Zelenskyn.

Dy përfaqësuesit amerikanë fillimisht udhëtuan drejt Moskës, ku zhvilluan takim me presidentin rus, ndërsa një ditë më vonë vazhduan misionin në Kiev, ku u takuan me presidentin ukrainas.

Qëllimi i këtyre kontakteve është shtyrja përpara e negociatave që synojnë përfundimin e luftës mes Rusisë dhe Ukrainës.

Shtëpia e Bardhë ka bërë të ditur se gjatë takimeve në Moskë janë diskutuar “plane thelbësore për hapat e mëtejshëm”, por deri tani nuk është bërë i ditur ndonjë rezultat konkret apo përparim i rëndësishëm.

Pas takimeve, Zelensky ka shprehur qëndrimin se përpjekjet e fundit diplomatike nuk pritet të çojnë në një përfundim të shpejtë të luftës.

Ndërkohë, Jared Kushner ka deklaruar se SHBA-ja shpreson që negociatat trepalëshe ndërmjet Rusisë, Ukrainës dhe Shteteve të Bashkuara të rifillojnë.