Nafta kalon 107 dollarë për fuçi, rritet pasiguria në tregjet globale
Çmimet e naftës u rritën sërish të martën, ndërsa pasiguria rreth negociatave mes Shteteve të Bashkuara dhe Iranit ka shtuar shqetësimet për inflacion dhe presione të reja në tregjet financiare.
Nafta kalon 107 dollarë për fuçi, rritet pasiguria në tregjet globale
Çmimet e naftës u rritën sërish të martën, ndërsa pasiguria rreth negociatave mes Shteteve të Bashkuara dhe Iranit ka shtuar shqetësimet për inflacion dhe presione të reja në tregjet financiare.
Nafta Brent, standardi ndërkombëtar, u rrit rreth 2 për qind, duke kaluar mbi 107 dollarë për fuçi, ndërsa WTI amerikane u rrit me rreth 1.8 për qind, duke kaluar 94 dollarë për fuçi.
Rritja vjen në një kohë kur shpresat për një zgjidhje të shpejtë të krizës në Lindjen e Mesme janë zbehur. Negociatat për një marrëveshje që do të mundësonte përfundimin e luftimeve dhe rihapjen e Ngushticës së Hormuzit vazhdojnë përmes ndërmjetësve.
Ngushtica e Hormuzit është një nga rrugët kryesore të transportit të naftës në botë, ndaj çdo pengesë në qarkullimin përmes saj mund të ndikojë në furnizimin dhe çmimet globale të energjisë.
Rritja e kostove të energjisë po shton gjithashtu presionin mbi inflacionin, pasi karburantet ndikojnë drejtpërdrejt në transport, prodhim dhe konsum.
Në SHBA, yield-i i bonove 10-vjeçare të Thesarit ka kaluar 5.27 për qind, ndërsa edhe tregjet evropiane kanë regjistruar rritje të kostove të huamarrjes. Yield-i i bonove 10-vjeçare të Gjermanisë është ngjitur në 3.62 për qind.
Tregjet e aksioneve në Azi u përballën me rënie, me Nikkei 225 që humbi 1.3 për qind, Kospi 0.9 për qind dhe Hang Seng 0.6 për qind.
Në tregun valutor, dollari amerikan u forcua lehtë ndaj jenit, ndërsa euro ra në 1.1362 dollarë. Ari mbeti pranë nivelit prej 4,160 dollarësh për ons.
Investitorët tani po presin të dhënat e reja amerikane për inflacionin dhe tregun e punës, të cilat mund të ndikojnë në vendimet e ardhshme të Rezervës Federale.
