Liridon Leci reagon pas deklaratës së TV Dukagjinit: “Bashkëpunimin e ndërpreva vetë”

Liridon Leci reagon pas deklaratës së TV Dukagjinit: “Bashkëpunimin e ndërpreva vetë”

Liridon Leci ka reaguar pas deklaratës së drejtorit të Informacionit në TV Dukagjini, Dibran Istrefi, lidhur me incidentin e raportuar pas emisionit “Dueli Sportiv”, ku dyshohet se u përfshi edhe ish-futbollistja Edonisa Aliu.

Përmes një postimi në Facebook, Leci ka pretenduar se bashkëpunimin me televizionin e kishte ndërprerë vetë, gjatë emisionit të së dielës, duke kundërshtuar njoftimin se TV Dukagjini kishte vendosur ta largonte.

Ai ka mohuar se ka sulmuar dikë, duke thënë se nuk ka pasur për qëllim të fyejë apo denigrojë asnjë person, veçanërisht ndonjë grua.

“Besoj se faktet duhet të flasin vetë dhe se secili duhet të mbajë përgjegjësi për atë që thotë dhe për mënyrën se si i interpreton fjalët e të tjerëve”, ka shkruar Leci.

Reagimi i tij vjen pasi TV Dukagjini njoftoi se kishte ndërprerë bashkëpunimin me të pas incidentit të raportuar me Edonisa Aliun. Televizioni bëri të ditur se rasti është duke u trajtuar nga organet e rendit dhe të drejtësisë.

**Shënim:** Pretendimet lidhur me incidentin mbeten të paqarta deri në sqarimin e plotë të rrethanave nga organet kompetente.