Ligji për Specialen ende nuk ka mbërritur te Presidentja, afati për veprim është tetë ditë

Ligji për Specialen ende nuk ka mbërritur te Presidentja, afati për veprim është tetë ditë

Ligji për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar ende nuk i është përcjellë Presidencës së Kosovës, ndonëse Kuvendi e miratoi më 6 tetor.

Sipas këshilltarit për media në Presidencë, Bekim Kupina, dokumenti pritet t’i dërgohet presidentes Justina Shiroka-Pula pas përfundimit të afatit tetëditor për kontestimin e tij në Gjykatën Kushtetuese, i cili përfundon më 15 tetor.

“Presidenca nuk e ka pranuar ende Ligjin për Dhomat e Specializuara. Sipas procedurës, Kuvendi e dërgon te Presidentja vetëm pas mbylljes së afatit 8-ditor për kontestim në Gjykatën Kushtetuese, deri më 15 tetor. Pastaj Presidentja Justina Shiroka Pula i ka në dispozicion 8 ditë për të ndërmarrë veprime”, ka deklaruar Kupina.

Ndryshimet ligjore u miratuan në lexim të dytë më 6 tetor, një ditë pas miratimit në lexim të parë. Nisma u propozua nga Partia Demokratike e Kosovës (PDK), në kohën kur proceset gjyqësore në Hagë kanë nxitur diskutime të shumta në Kosovë.

Ligji nuk parasheh shfuqizimin e Gjykatës Speciale, por ndryshime në disa aspekte të funksionimit të saj, përfshirë juridiksionin, periudhën kohore që mbulon, dënimet, vendin e ekzekutimit të tyre dhe trajtimin e rasteve që mund të mbeten jashtë kompetencës së saj.

Nisma erdhi pas aktgjykimit të shkallës së parë të 16 shtatorit ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi. Sipas vendimit, Thaçi dhe Krasniqi u dënuan me nga 25 vjet burgim, Veseli me 18 vjet, ndërsa Selimi me 13 vjet për krime lufte. Të katërt u shpallën të pafajshëm për akuzat për krime kundër njerëzimit.

Aktgjykimi nuk është i formës së prerë dhe mbrojtja ka paralajmëruar ankesa.

Hapi i radhës është përfundimi i afatit për kontestimin e ligjit në Gjykatën Kushtetuese dhe përcjellja e tij te presidentja, e cila do të ketë tetë ditë në dispozicion për të ndërmarrë veprimet e parapara me Kushtetutë.