Barcelona ia rrëmben Real Madridit talentin ganez, Hafiz Gariba në planet e Flickut

**Barcelona ia rrëmben Real Madridit talentin ganez, Hafiz Gariba në planet e Flickut**

Barcelona duket se ka gjetur një alternativë për të mbuluar mungesën e Andreas Christensenit, i cili pritet të qëndrojë jashtë fushave për më shumë se gjashtë javë pas dëmtimit të pësuar ndaj Sevillas.

Sipas gazetës spanjolle *Sport*, mbrojtësi 19-vjeçar nga Gana, Hafiz Gariba, është shfaqur si një kandidat për t’iu bashkuar ekipit të parë të Barcelonës. Ai ka bërë paraqitje të mira me skuadrën rezervë, duke e mbajtur portën të paprekur në tri ndeshjet e para të sezonit.

Rrugëtimi i Garibas ka nisur në rrugët e Akrës, ku u zbulua nga fondacioni “Marcet”. Për shkak të pengesave burokratike, ai nuk mundi të bashkohej menjëherë me një ekip të nivelit më të lartë në Spanjë dhe përfundoi te “Codolari”, në kategorinë e katërt të futbollit katalunas.

Paraqitjet e tij në këtë nivel tërhoqën shpejt vëmendjen e skautëve të Real Madridit dhe Barcelonës. Të dy klubet, sipas *Sport*, paraqitën oferta për transferimin e mbrojtësit.

Barcelona arriti ta fitojë garën për Gariban falë ndërhyrjes së drejtuesit të akademisë, Toni Hernandez, i cili veproi shpejt dhe e bindi lojtarin për projektin e klubit katalunas. Kështu, Gariba iu bashkua akademisë “La Masia”.

Sipas *Sport*, mbrojtësi pati edhe një pengesë gjatë verës, pasi një infeksion viral e la jashtë grumbullimit të Anglisë. Pas rikuperimit, ai u rikthye në formë dhe u bë një prej lojtarëve kryesorë të skuadrës rezervë të Barcelonës.

Paraqitjet e tij kanë tërhequr edhe vëmendjen e Hansi Flickut. Trajneri gjerman kërkon një profil mbrojtësi që mund të përballojë një vijë të lartë mbrojtëse dhe të reagojë shpejt në hapësirat e krijuara pas saj.

Shpejtësia dhe aftësia e Garibas për t’u rikthyer në mbrojtje janë ndër karakteristikat që e bëjnë atë një opsion interesant për sistemin e Flickut.