Rusia përmend një “operacion të ri special ushtarak”, në fokus skenari me Lituaninë

Agjencia shtetërore ruse RIA Novosti ka publikuar një koment ku shqyrtohet skenari i një konflikti të mundshëm mes Rusisë dhe Lituanisë. Artikulli, i shkruar nga Alexander Nosovich, e paraqet Lituaninë si objekt të mundshëm të një operacioni të ardhshëm ushtarak rus.

Në koment përmenden skenarë që përfshijnë përdorimin e raketave, madje edhe atyre me mbushje bërthamore, ndërsa autori e krahason një konflikt të mundshëm në Baltik me luftën në Ukrainë. Megjithatë, këto janë skenarë të paraqitur nga autori dhe jo një plan i konfirmuar ushtarak i Rusisë.

Publikimi vjen në kohën kur Lituania po shqyrton ndryshimin e një neni kushtetues që ndalon vendosjen e armëve bërthamore në territorin e saj. Parlamenti e ka miratuar propozimin në lexim të parë, ndërsa për miratimin përfundimtar nevojiten edhe dy votime.

Presidenti lituanez Gitanas Nausėda ka deklaruar se nuk ka plane të menjëhershme për vendosjen e armëve bërthamore në vend. Ndërkohë, zëdhënësi i Kremlinit, Dmitry Peskov, ka paralajmëruar më herët se një vendosje e tillë do ta kthente Lituaninë në objektiv të armëve bërthamore ruse.

Komentet ruse vijnë gjithashtu pas një incidenti me një dron të tipit “Gerbera” në hapësirën ajrore të Lituanisë. Moska, nga ana tjetër, ka deklaruar publikisht se nuk ka plane për të sulmuar vendet evropiane.